Mamallakta Tantanakuy, kay 933 niki rimanakuypi, Ecuador llaktapi shinallatak Latinoamérica suyu llaktakunapi Warmikuna apushitay kallarishka Shuk Patsak watakuna paktashkamanta yuyarishpa sumaycharka, kay pachakunapimi atirik Matilde Hidalgo Navarro warmi llaktapi kari warmi paktakaman chayashkata yuyarin. Shinallatak, shuk yuyarinakushka killkawan, Mamallakta Tantanakuy wasi ukuman yaykunata Ecuador llakta ayllupak shutita churarka, payka Loja llaktamantami karka shinallatak paypak kawsayta shinallatak paypak llamkashkatapash wiñayta yuyarinapak shuk unanchakillkata churarka.
Henry Kronfle Kozhaya, Mamallakta Tantanakuyta pushakmi, Matilde Hidalgo runapak kawsayta apushitanapak hayñi paktashka patsak watakuna yallishkamanta riksichirka. Riksishka ayllumi karka; atirik warmi, kallaripi apushitaklla mana karkachu, ashtawanpash warmikunapak hayñikuna tukuy ruraykunapi paktachunmi atirirka, kayshina llamkaykunami Latinoamérica suyu llaktakunapi warmikuna chayanata paskashka. "Paypak atiriyka llaktayukkuna alli kawsayta tarichunmi karka, kayshina pakta pakta chimpapurashka kawsayta paktanapak" ninmi.
Paymantaka, Sofía Lara Valarezo runa, Unidad Educativa Eugenio Espejo yachanwa wasimanta, Loja llaktapi yachakuk, Matilde Hidalgo runapak kawsaymanta rimashpa, llakpi wiñayta yuyarinami, chawpi yachay wasipilla mana yuyarinachu, ashtawanpash Hampinatapash yacharka nirkami.
Yuyarinakushka killkataka, Johanna Ortiz kamachi killkakmi Ecuador llaktapi warmikuna apushitay kallarishka patsak watakuna Ecuador llaktapi shinallatak Latinoamérica suyullkatakunapi paktashkamanta yuyarinakuypi Mamallakta Tantanakuypak wasi ukuman yaykunata Matilde Hidalgo nishpa shutichinapak mañayta chayachirka, kay killkataka tukuy chaypikak 121 kamachiy killkakkunami arinirkakuna. Johanna Ortiz runaka Matilde Hidalgo warmi warmikuna apushitaywan paktarishpa llaktayuk chaypi kanapi yanapashkata rimarka, kunanpi paktashka alli rikurishkapash wiñaykawsaypika achka watakunapimi sinchyashpa shamishka, warmikuna sinchita tawka watakuna atirinakushkamanta paktashkamanta charishkami kan, nirka.
Unanchaykuna
Kay raymipika, Mamallakta Tantanakuymi Matilde Hidalgo shuti unanchata, Llaktayukta Yanapashkamanta, tawka tantanakuykunaman, warmikuna tantarishkakunaman shinallatak llaktayukkunamantapash llaktata yanapashkamanta, warmikunata Ecuador llaktapi yanapashkamanta riksirishpa kararka. Shinallatak Loja llaktamanta Óscar Benítez Campoverde shuyuk runaman, Matilde Hidalgo aylluta shuyushkamanta, Mérito Cultural riksirik unanchata chayachirka.
Matilde Hidalgo Shuyu
Mamallakta Tantanakuyta pushak, Viviana Veloz shukniki kipapushakwan shinallatak CAL wankurimanta tawka rimarikkunawanmmi, Matilde Hidalgo Navarro runapak ñawi shuyuta riksichirka, kay shuyutaka Loja llaktamanta, Óscar Benítez Campoverde, runami rurarka, payka kay Ecuador llaktapi shinallatak Latinoamérica suyullaktapi warmikuna apushitayta kallarichinapak atirik warmipak kawsaymi yuyayta sinchiyachirka, nirkami.
Viviana Veloz, kayshina riksirishkawanka Matilde Hidalgo, Nela Martínez, Tránsito Amaguaña warmikunashina hayñita charinapak atirishpa llamkashkak warmikunaman chayachishka katinami nirka. Munanimi kayshina llirpu katakuna shamuk watakuna pakirichun shinallatak warmikuna ashtawan llaktay ruraypi kimirishpa katichunmi kayachirka.
EG/pv/cg-k
Ashtawan shuyukuna:
