Shuk yuyarina rimanakuypimi kuna puncha Mamallakta Tantanakuyka, 01 puncha wayru killata "Día de la Identidad Montubia Ecuatoriana" nishpa shutichin shinallatak Los Ríos markatapash riksirishpa "Capital Nacional Del Cacao" nishpa shutichirkakuna.
Mamallakta Tantanakuyka, tukuykuna tantarishkata riksishpami raymipi, tushukkunawan shinallatak kawsaytarpuyta riksichiywanpash Ecuador llaktapi kawsak riksishka llaktakunata hatunayachirka.
Chaypikak tukuy kamachiy killkakunami, 113 ari apushitashkawan, "Día de la Identidad Montubia Ecuatoriana" nishpa shutichinapak mañashkata arinirka, kayshinami llaktakunapak wiñaykawsayta shinallatak paykuna imalla charishkata riksirishpa hatunyachirkakuna.
Kay Los Ríos markatapash "Capital Nacional del Cacao" nishpa shutichinapak 111 arinishka apushitayta chaskirka, kaypika may marka Ecuador llaktapak llamkaykullkiman pakta pakta yanapashkamanta riksirishkami kan, nirka.
Fernando Cerón, Casa de la Cultura Ecuatoriana tantanakuyta pushak, Mamallakta Tantanakuypi rimarishpaka llaktayukkunapura makipurashpa shinallatak wiñaymanta charishkata riksishpami kawsana nirkami. "Mamallaktashina paktami kanchik, shuk Mamallaktachiy, tawpa llaktapura kawsak llaktata wiñachinapak shinallatak sinchiyachinapakpash.
Ashtawanka, Wiñaymanta kawsak yunka llakta ayllukunata riksina shinallatak shukyanchik tantachik Mamallaktachiyta wiñachina. Javier Véliz Alvarado, arqueólogo e investigador en ciencias sociales y antropología runaka, patas muru kay llaktapak llamkaykullkipi yanapashkata yuyachirka shinallatak Los Rios markapi tarpuykuna paktashkatapash rimarka.
Kay "Capital Nacional del Cacao" riksinakuyka Ecuador llaktapi riksinaklla tarpuk runakunata sumaychan shinallatak munachinpash, kayshina riksirishkawanka kay llaktapi kawsakkunapak shinallatak istallaktapi kawsakkunapak hatun allimi kan. Kay yuyaykunaka Ecuador llaktapi tawkapura kawsashka riksina shinalaltak sinchita tarpukkuna kashkata riksirishkami, shinami mamallakta shuklla kashkata sinchiyachishun kikinyaytapash wiñachishun, ashtawankarin mamallaktapak kullkillamkayta patas muruwan kimirishpa yanapashun.
Shinallatak, Mamallakta Tantanakuyka tukuy llaktapi pushakkunatami ruraykunawan shinchiyachinapak kayachirka tukuy Ecuador llakta ayllukunata pakta yanapanapak, nirkami.
Mónica Salazar kamachi killkak, mañayta chayachik, Mamallakta Tantanakuy Los Rios markapak wiñaykawsayta shinallatak charishkakunata riksirishkamanta yupaychani nirka. "Kawsaytarpuyta riksichik ayllukuna shinallatak llaktayukkunapash kayshina riksirishkamanta kushiyashpami yupaychan", Salazar nirkami, kay markapak kasiklla kawsay kay punchakuna wakllarishkalla rikurikukpi kayshina riksirinaka achka allimi kan, nirka.
Shinallatak, Viviana Zambrano kamachi killkakka kay llaktapi kikin kawsaytarpuy shinallatak ruraykunapash tiyashkata riksichirka, runa ayllu llaktakunapi kawsayta rimarka. Sixto Parra runaka kay llaktapi tarpunakunata riksinami allikan shinallatak kay llaktapi tarpushpa llamkak ayllukunata shinallatak paykunapak llamkaymanta tantachishkata ukllana chaparanamanmi llakta pushakta kayachirka. Camilo Salinas runaka Los Ríos markaka Ecuador llaktapi ashtawan kawsayta charikpika chuskunikipimi kan, 60% patsak ayllukunami yunkakuna, shinallatak patas muruka kay llaktapi shinallatak istallaktapi riksirishkami kan, nirka.
Yuyarinakushka killkapika Ministerios de: Cultura; Educación; shinallatak, Turismo; Secretaría de Gestión y Desarrollo de Pueblos y Nacionalidades; shinallatak Consejo Nacional para la Igualdad de Pueblos y Nacionalidades tantanakuy pushakkunatami ayllu llaktakunapi llaktapipash llamkanapak churashkata riksichichun kayachinka. Shinallatak tukuy mamallaktapak yachana wasikunapi kay pachakunata yuyarinaman kayachin, ashtawanka Ecuador llakta yunka ayllukunapak hayñita ruraykunawan kuyuchishkata llamkaywillaypi riksichichunmi kayachin.
Kayshina yuyarinakushka killkawanka Ecuador llakta tawka ayllukunayuk kashkata shinallatak wiñaymanta kawsay charishka riksishkami kan, shinallatak kutinpashmi nirka yunka ayllukunata riksishpa katina kan kayshina mamallaktapak charishkaman mirachinkapak, nirka.
SJ/pv/cg-k
Ashtawan Shuyukuna:
