Mamallakta Tantanakuyta pushak, kay chillay 24 puncha sitwa killami, Guayaquil kiti, 489 watakuna wiñashka paktashkamanta unancharka. Rimanakuyka Auditorio Principal de la Universidad Tecnológica Empresarial de Guayaquil (UTEG) sumak yachanawasi ukupimi paktarirka shinallatak kay rimanakuymanka llaktayukkuna, awkakuna, chapakkuna, shinallatak apunchik katik runakuna, Guayaquil kitimanta ayllukunapash chayamurka.
Susana Merino, kay Unidad Educativa Bilingüe del Colegio Americano de Guayaquil yachanawasipi yachachik, Guayaquil kiti wiñarishkata riksichirka, kay kitika wiñaykawsapak hatun mushukyaytami charin, Guayas mayupak manyapi wiñachishkamanta, llakta kullkillamkay shinallatak istallaktawan mintalaypipash sinchita yanaparka, ashtawanka Ecuador llaktapak riksishka punusuyumi kashka. "Guayaquil llaktaka ñukanchikmantami shayarishpa kawsan", nirkami.
Puchukaypika, Guayaquil llakta wiñarinapak sinchita yachaypi, llaktayuk tantanakuypi, maki ruraypi shinallakta kawsaytarpuypipash yanapak llaktayukkunaman shinallatak tantanakuymanpashmi riksirishkapa unanchata chayachirka, .
Kay raymika Guayaquil llaktamanta Violinista Jorge Saade, pianista Juan Carlos Escudero takukkuna kushiyachishkami karka.
Mamallakta Tantanakuyta pushak, Henry Kronfle Kozhaya runaka kushillami kani nirka, kay kiti wiñarishkallata mana yuyarikunchikchu, ashtawanpash kari warmi runakuna pakta sinchita llamkashkatami yuyarikunchik, nirkami.
Ecuador llaktapak shinallatak Guayaquil llaktapakmi sinchita llamkakunchik nirkami. Llaktayukkuna alli kawsayta paktachunmi tukuy llamkaykuna chayachishkaka paktana kan nirkami, shinallatak kay pusak killakuna llamkaypi 25 kamachiykunatami arinishkanchik shinami llakta wiñarinapak llamkakunchik, kay kamachiykunaka kullkillamkayta, yachanata, hampinata shinallatak kasiklla kawsanapimi yanapanka. "Mamallakta Tantanakuyka chimpapurak ayllukunata mana charinchuk, tukuykunami mashiyashpa llamkakunchik; shinka makipurak ayllukunaka Ecuador llaktayukmi kan", nishpami puchukarka.
Kay raymi puchukanapika, Pamela Cortés runami Guayaquil kitipak hayllita takirka, chay kipaka Mamallaktapak wiphala shinallatak pushakkunapash llukshirka.
EG/am/cg-k
Ashtawan shuyukuna: